en historio
dum oktobro
50, 100 e 150 yari ante nun …
26 di oktobro 1972. En Easton, Connecticut Usa, Igor Sikorsky, inventanto di la helikoptero, mortis evante 83 yari. Il naskis en Kyiv; lua patro, Ivan Alexeevich Sikorsky, esis profesoro di psikologio, ed esis decendanto di Polona nobeli. La yuna Igor esis inspirata da la verkaro di Leonardo da Vinci e la rakonti di Jules Verne. Il studiis kom injenioro ye la navala akademio di Sankt Peterburg. Dum 1909 il studiis en Paris, qua lore esis notinda aviacala centro. En 1913, ye la aviacilo-fako di fervoyala veturo-fabrikerio en Sankt Peterburg, il konstruktis la unesma quar-motora aeroplano qua povis flugar. De 1919 il rezidis en Usa. Pos kelka yari kom docisto il establisis kompanio qua desegnis e produktis mar-aeroplani. Il havis intereso pri vertikala flugado, ed en 1940 ilua experimentala helikoptero flugis unesmafoye, e ca desegnuro divenis l'unesma helikoptero fabrikita en granda nombri.
19 di oktobro 1922. En Paris, la versiono por orkestro da Maurice Ravel di Pikturi che Expozo, da la Rusa kompozisto Modest Mussorgsky, esis unesmafoye pleata. L’orkestro direktesis da Serge Koussevitzky, qua komisabis Ravel krear la verko. Mussorgsky kompozis l’originala verko por piano en 1874, ed ol publikigesis pos ilua morto , en edituro da Nikolai Rimsky-Korsakov en 1886. La versiono da Ravel esas la maxim ofte pleata; altra orkestrala versioni di la verko facesis da Henry Wood, Leopold Stokowski e plura altri.
10 di oktobro 1872. En Auburn, New York, William H. Seward, Usana Sekretario di Stato de 1861 til 1869, mortis evante 71 yari. Il studiis lego en l'urbo New York, e pose divenis advokato en Auburn. Il esis importanta membro di la Republikana-partiso dum olua frua yari. En 1860 il esis egardata kom la precipua kontestanto por prezidentala nomineso da ta partiso, ma il esis vinkata da Abraham Lincoln. Il esas partikulare konocata pro ilua direktado di la kompro en 1867 di Alaska de Rusia.
|
|
|
Kunlaborez! +/-
 München, e la parko ube eventas Oktoberfest. München esas chef-urbo di Germana stato Bavaria. Segun statistiki de 2015, ol havis 1 450 381 habitanti. Lua tota surfaco esas 310,43 km². Ol esas la 3ma maxim populoza urbo di Germania, dop Berlin e Hamburg. Lua metropolala regiono habitesas da 6 milion personi.
talpo Talpo esas familio di mamiferi mikra (longeso de 15 til 20 cm, pezo de 100 til 125 grami, qui manjas precipue insekti e lombriki, en regioni di temperema klimato. Li exkavas tuneli en humida sulo, videbla kom sulo-monteti.
Tale nomizita Equatorala e tropikala foresti existas en 4 kontinenti: Amerika (la maxim vasta surfaco), Afrika, Azia ed Oceania, jacanta aproxime inter la Tropiko di Kankro e la Tropiko di Kaprikorno. Foresti Equatorala, tropikala ed anke subtropikala okupas entote cirkume 17 milioni km², o 20% de la tota emersita surfaco de la planeto.
|
|
